وہی ہوتی ہے رہبر جو تمنا دل میں ہوتی ہے
بقدر ہمت رہرو کشش منزل میں ہوتی ہے
محبت دل میں ہوتی ہے تمنا دل میں ہوتی ہے
جوانی عمر کی کتنی حسیں منزل میں ہوتی ہے
محبت اے معاذ اللہ محبت دم نکل جائے
اگر محسوس بھی اتنی ہو جتنی دل میں ہوتی ہے
ٹھہرنے بھی نہیں دیتی ہے اس محفل میں بیتابی
مگر تسکین بھی جا کر اسی محفل میں ہوتی ہے
مرا کیا ساتھ دیں گے غیر بحر عشق میں بسملؔ
وہ اس کشتی میں ہیں جو دامن ساحل میں ہوتی ہے
بسمل سعیدی