وہ لگتا تھا ، ۔۔۔۔۔۔۔۔۔۔ مگر اپنا نہیں تھا
سٙو بِچھڑا تو مجھے صَدمہ نہیں تھا
گُماں کی دُھند میں لِپٹا یقیں تھا
وہ میرا تھا ، ۔۔۔۔۔ مگر میرا نہیں تھا
عجب بٙے رنگ سی دنیا تھی جب تک
محبت کا مَزا ۔۔۔۔۔۔۔۔۔۔۔۔۔ چکّھا نہیں تھا
میں اُس کو خود سے بڑھ کر چاہتا تھا
وہ پاگل پن میرا سمجھا نہیں تھا
اَنا کے دَائرے میں ۔۔۔۔۔۔۔۔۔۔۔۔۔ تھا مقیّد
وہ کاجل ، جب تلک پھیلا نہیں تھا
شکایت کیا بَھلا کرتے کسی سے
ہمیں جب آپ نے سَمجھا نہیں تھا
مقابِل آئینہ آیا ۔۔۔۔۔۔۔۔۔۔۔۔۔۔۔۔۔۔۔۔ تو جانا
وہ چہرہ تو مِرا ، ۔۔۔۔۔۔۔ چہرہ نہیں تھا
گریزاں ہو گیا ۔۔۔۔۔ سایہ بھی مُجھ سے
میں اِتنا تو کبھی تنہا نہیں تھا
اَزل سے ہے ۔۔۔۔۔۔۔ محبت میں خَسارہ
مُنافع کا تو یہ ۔۔۔۔۔۔۔۔۔۔ سٙودا نہیں تھا
یہ دنیا ہے ۔۔۔۔ یہاں سب کچھ ہے ممکن
مگر ایسا ، ۔۔۔۔۔۔۔ کبھی سوچا نہیں تھا
محبت نے کیا بٙدنام ، ۔۔۔۔۔۔۔۔۔۔۔۔۔ یُونس
میں شاعر تھا ، مگر رُسوا نہیں تھا
یونس عظیم