وہ مرے خواب بکھرنے کا سبب پوچھتا ہے
غم کے دریا کے اترنے کا سبب پوچھتا ہے
پہلے تو خود ہی گیا چھوڑ کے مجھ کو تنہا
پھر مرے ٹوٹ کے گرنے کا سبب پوچھتا ہے
جب میں ناکامِ محبت ہوں تو پھر کیسی انا
آئنہ مجھ سے سنورنے کا سبب پوچھتا ہے
سانحہ ہے کے ہے تاریک یہ دنیا میری
چاند سورج سے نکلنے کا سبب پوچھتا ہے
یہ بھی کیا خوب ہے خود مجھ سے ستم گر میرا
دل کی دنیا کے اجڑنے کا سبب پوچھتا ہے
کیا عجب ہے کے لیے آنکھوں میں آنسو اپنے
میرا قاتل مرے مرنے کا سبب پوچھتا ہے
یہ بھی دیکھا ہے کے اقبال مرا قاتل بھی
یوں مرے جاں سے گزرنے کا سبب پوچھتا ہے
ڈاکٹر سید محمد اقبال شاہ