غزل
وہ میرے بارے میں ایسے بھی سوچتا کب تھا
اگر میں عکس نہیں تھی وہ آئنہ کب تھا
جو جوڑ دیتا تعلق کے سب روابط کو
ہمارے بیچ کوئی ایسا سلسلہ کب تھا
وہ زینہ زینہ مرے دل میں یوں اترتا گیا
میں روک پاتی اسے مجھ میں حوصلہ کب تھا
وہ خوش گمان بہت تھا کہ میں ہوں اس کی مگر
یہ آرزو تھی فقط میرا فیصلہ کب تھا
وہ میرے ضبط کو ہر آن آزماتا رہا
میں سنگ زاد ہوں اس کو مگر پتہ کب تھا
سنا نہیں جو کہا تھا تو کیسے سمجھاتے
جو اس نے سمجھا تھا میرا وہ مدعا کب تھا
بہار بن کے وہ ملنے تو آ گیا تھا مجھے
ٹھہر بھی جائے گا یہ اس کا فیصلہ کب تھا
فرح اقبال