ٹوٹی ہے قسم ٹوٹے کئی بار بھرم تک

Tooti hay Qasam Tootay Kaee Baar bharam Tak

غزل

ٹوٹی ہے قسم ٹوٹے کئی بار بھرم تک
پھر پہنچا ہوں اے عشق ترے نقشِ قدم تک

برباد نہ ہو جائے کہیں خوابوں کا مسکن
رہنا ہے مجھے سینہ سپر آخری دم تک

ہوجائیں اگر باغی مقدر کی لکیریں
پھر اپنے کہاں رہتے ہیں گھر بار صنم تک

اس آس پہ چھوٹا نہیں امید کا دامن
میں میں سے چلی آئے گی خود سر کبھی ہم تک

یہ علم نہیں تھا کہ یہ ماں جائے ہی میرے
بازار میں رکھ دیں گے مری آنکھ کا نم تک

سوچوں کی رگیں نوچنا پڑتی ہیں مری جاں
آوازِ الم جاتی ہے پھر نوکِ قلم تک

وہ کیسی حقیقت ہے جو لانے میں ہے ناکام
اک چشمِ تماشائی میں وہ پیالہِ جم تک

یہ کس کے قدم دل کی حویلی میں پڑے ہیں
حیران پریشان ہے تلوارِ ستم تک

اے کاش مرے قدموں تلک آئے وہ رستہ
لے جائے جو دنیا سے مجھے باغِ ارم تک

اے موجِ شفق موجِ صبا موجِ نسیمی
آنے دو مکیں خواب کو اس دل کے حرم تک

نسیم شیخ

Naseem Shaikh