Chaar Ghazloo kay ilawa koi Jageer Nahi
غزل
چار غزلوں کے علاوہ کوئی جاگیر نہیں
یہ خوشی ایسی ہے جس کی کوئی تفسیر نہیں
لے ہی آؤں گا ہتھیلی کی لکیروں میں تجھے
مصلحت نام کی اب پیروں میں زنجیر نہیں
اب تو رکھنے لگے اس دل کا مرے زخم خیال
یعنی اب سامنے تو ہے تری تصویر نہیں
میرے خوابوں کا ہوا قتل مری آنکھوں میں
سانحہ ہے یہ مگر قابلِ تشہیر نہیں
اس نے دیکھا ہے مری سمت عجب نظروں سے
یہ کسی طور مرے خواب کی تعبیر نہیں
ایسا ممکن ہی نہیں زخم پہ مرہم نہ رکھے
اتنی کم ظرف تو اس عشق کی تاثیر نہیں
آخری چال چلوں گا میں یہاں اپنے خلاف
کیونکہ اب ساتھ مرے میری ہی تقدیر نہیں
آہ کو عکس کیا سوچ کو تسخیر کیا
میں وہ معمار ہوں جو قابلِ توقیر نہیں
شاخِ حسرت پہ نظر آئے ہیں امید کے پھول
یہ محبت کا فسوں ہے کوئی تدبیر نہیں
آج اک موجِ نسیمی نے کیا میرا طواف
قابلِ فکر ہے یہ حاصلِ تحریر نہیں
نسیم شیخ
Naseem Shaikh