ڈھونڈ لیتے ہیں کوئی اور سہارا ہم تم

Dhoond Leetay Hain koi aur sahara Ham tum

غزل

ڈھونڈ لیتے ہیں کوئی اور سہارا ہم تم
آؤ اس شہر سے کرتے ہیں کنارا ہم تم

اپنے زخموں سے ابھی لوگ کہاں واقف ہیں
ساتھ رکھتے ہیں جو پلکوں پہ ستارا ہم تم

بعد برسوں کے ملایا ہے ستاروں نے ہمیں
مل رہے ہیں جو گلے لگ کے دوبارہ ہم تم

آئنہ ٹوٹ بھی سکتا ہے ذرا دھیان رہے
سنگ کے دیس میں کرتے ہیں گزارا ہم تم

ہجر کی قید سے آزاد بھی ہو سکتے ہیں
دل میں بھڑکائیں اگر ایک شرارا ہم تم

پیچھے ہٹنے کو ولیؔ دل ابھی مانے گا نہیں
عشق میں کرتے رہیں لاکھ خسارا ہم تم

شاہ روم خان ولیؔ

Shah Room Khan Wali