غزل
کسی انسان کو اتنا نہ ستایا جائے
کہ وہ اپنوں سے بھی ہوکر کے پرایا جاۓ
یہ عمل بھی تو عبادت کا اثر رکھتا ہے
کسی روتے ہوئے بچے کو ہنسایا جائے
جس پہ دنیا کے سب انسان اب اک ساتھ چلیں
کم سے کم راستہ اک ایسا بنایا جائے
یہ زمیں بوجھ زیادہ نہیں سہہ سکتی ہے
نفرتیں بانٹنے والوں کو مٹایا جائے
آسمانوں کا جگر چیر کے جائے گی صدا
نعرہء حق جو فضاؤں میں لگایا جائے
پہلے تصدیق کرو ٹھیک سے اس کے حق میں
مرتبہ یوں ہی کسی کا نہ بڑھایا جائے
روشنی کم ہوئی جاتی ہے اس کی شب و روز
اب منور کو منور سے ملایا جائے
منور جہاں زیدی