کوئی مجھ میں ہی تھا نا قابل تسخیر، سو ہے

کوئی مجھ میں ہی تھا نا قابل تسخیر، سو ہے
وہ جو رکھتا تھا بہت حسن تدابیر۔۔۔۔۔۔ سو ہے

زلزلے اپنی تباہی کا۔۔۔۔۔۔۔۔۔۔۔۔۔۔۔۔ مقدر ہی سہی
دل میں رکھتے تھے ہم اک جذبۂِ تعمیر، سو ہے

ٹوٹتی جاتی ہیں رشتوں کے سبھی زنجیریں
مامتا کی بڑی مضبوط تھی زنجیر۔۔۔۔ سو ہے

محسنوں کے سبھی احسان۔۔۔۔۔۔۔۔۔ چکا آیا ہوں
ماں کے احسانوں کا سر پر جو تھا شہتیر سو ہے

زر، زمیں، جو بھی عزیزوں میں بٹا۔۔۔ ختم ہوا
میرے حصے میں دعاؤں کی تھی جاگیر سو ہے

ایک مدت سے ہوں کوشاں۔۔۔۔۔ کہ مکمل کرلوں
جوں ادھوری تھی مری زیست کی تصویر سو ہے

حج بھی کرتا ہوں۔۔۔ زکوۃ، اور نمازیں بھی ادا
دل میں بستی تھی کہیں خواہشِ تشہیر، سو ہے

نیند میں دیکھے ہوئے خواب تھے سب بےمعنی
جاگتی آنکھوں کے خوابوں کی تھی تعبیر سو ہے

اب بھی کچھ شعر۔۔۔۔۔ تغزل کا مزہ دیتے ہیں
میں جوانی میں جو لکھتا رہا تحریر ، سو ہے

اقبال گوہر