کچھ اپنی فکر نہ اپنا خیال کرتا ہوں

کچھ اپنی فکر نہ اپنا خیال کرتا ہوں
تو کیا یہ کم ہے تری دیکھ بھال کرتا ہوں

مری جگہ پہ کوئی اور ہو تو چیخ اٹھے
میں اپنے آپ سے اتنے سوال کرتا ہوں

اگر ملال کسی کو نہیں مرا نہ سہی
میں خود بھی کون سا اپنا ملال کرتا ہوں

یہ چاند اور ستارے رفیق ہیں میرے
میں روز ان سے بیاں اپنا حال کرتا ہوں

تمہاری یاد بھی آتی ہے اب مجھے کم کم
تمہارا ذکر بھی اب خال خال کرتا ہوں

رمزی آثم