کچھ دن تو بسو مری آنکھوں میں
پھر خواب اگر ہو جاؤ تو کیا
۔
کوئی رنگ تو دو مرے چہرے کو
پھر زخم اگر مہکاؤ تو کیا
۔
جب ہم ہی نہ مہکے پھر صاحب
تم باد صبا کہلاؤ تو کیا
۔
اک آئنہ تھا سو ٹوٹ گیا
اب خود سے اگر شرماؤ تو کیا
۔
تم آس بندھانے والے تھے
اب تم بھی ہمیں ٹھکراؤ تو کیا
۔
دنیا بھی وہی اور تم بھی وہی
پھر تم سے آس لگاؤ تو کیا
۔
میں تنہا تھا میں تنہا ہوں
تم آؤ تو کیا نہ آؤ تو کیا
۔
جب دیکھنے والا کوئی نہیں
بجھ جاؤ تو کیا گہناؤ تو کیا
۔
اب وہم ہے یہ دنیا اس میں
کچھ کھوؤ تو کیا اور پاؤ تو کیا
۔
ہے یوں بھی زیاں اور یوں بھی زیاں
جی جاؤ تو کیا مر جاؤ تو کیا
عبید اللہ علیم