کچھ نظر اور جھکا کر ملنا

غزل

کچھ نظر اور جھکا کر ملنا
مجھ کو پلکوں میں چھپا کر ملنا

شہر دل شہر خموشاں تو نہیں
پھر بھی تم پاؤں دبا کر ملنا

پیر اشکوں سے دھلا دوں گا میں
تم مرے گھر کبھی آ کر ملنا

نیند آنکھوں میں بھلی لگتی ہے
مجھ کو نیندوں میں بسا کر ملنا

مجھ کو آواز نہ دینا ہرگز
میری تنہائی پہ چھا کر ملنا

وہ جو چپ چاپ سا بیٹھا ہے وہاں
اس کی آنکھوں میں سما کر ملنا

ہاں وہی شخص ہے اقبال متینؔ
آئنہ اس کو دکھا کر ملنا

اقبال متین