کیا ہوں میں اس کی چشمِ صد اعجاز کے بغیر
کچھ بھی نہیں ہو اس نگہِ ناز کے بغیر
کھولی ہی تھی زبان کہ لب سی دئیے گئے
اک قصہ ختم ہو گیا آغاز کے بغیر
لب بستگی نہ دیکھ مرا رقصِ عمر دیکھ
یہ گیت گا رہا ہوں میں آواز کے بغیر
اک شان سے کیا ہے سفر شہرِ درد میں
اٹھا نہیں ہے کوئی قدم ناز کے بغیر
شکوہ کناں بھی اس سے رہوں اور جب وہ جائے
رہ بھی نہ پاؤں اس بتِ طنار کے بغیر
وہ بادشاہِ ملکِ سخن ہوں جو خوش رہے
تاج و کلاہ و منصب و اعجاز کے بغیر
ڈاکٹر اقبال پیرزادہ