گلشنِ جاں میں خس و خاشاک سے کیا کیا ہوا

گلشنِ جاں میں خس و خاشاک سے کیا کیا ہوا
پوچھتے کیوں ہو دل صد چاک سے کیا کیا ہوا

کس کو فرصت تھی شبِ فرقت میں پوچھے چاند سے
وقتِ رخصت دیدہِ نمناک سے کیا کیا ہوا

صرف وحشت ہی نہیں تھی موسمِ گل میں مری
تم کیا جانو اس گریباں چاک سے کیا کیا ہوا

یہ فرشتوں کے گماں میں بھی نہ آیا تھا کبھی
کچھ نہ ہو نا تھا مگر اس خاک سے کیا کیا ہوا

کچھ بچا ہی کب تھا کوئی سوچتا جو بیٹھ کر
خیمہِ جاں پر شبِ سفاک سے کیا کیا ہوا

قیصر و کسری سے آگے کی بھی کچھ تاریخ پڑھ
تاجداروں کی بچی املاک سے کیا کیا ہوا

اٹھ کے پہلو سے مرے جاتے ہوئے یہ پوچھنا
شامِ وعدہ اس گریباں چاک سے کیا کیا ہوا

خامشی تجدید ِ الفت میں ہوئی کب کارگر
یہ بتا ثاقب لب بیباک سے کیا کیا ہوا

سہیل ثاقب