گھرانوں سے محبت کی فضائیں چھین لیتے ہیں
ستمگر پھول سے بچوں کی مائیں چھین لیتے ہیں
ہمارے بادشاہوں کو ہے نفرت شورِ سے اتنی
کہ مظلوموں سے رونے کی صدائیں چھین لیتے ہیں
کہیں ہیں کفر کے فتوے کہیں شور ملامت ہے
خدا جب لوگ بن جائیں جزائیں چھین لیتے ہیں
الٰہی تیری بستی میں یہ کیسے لوگ بستے ہیں
سروں پر ہاتھ رکھتے ہی ردائیں چھین لیتے ہیں
کسی مفلس کی مجبوری کسی کی بھوک کا سودا
خدا کے نام پر ظالم قبائیں چھین لیتے ہیں
زبانِ نرم سے کرتے ہیں پہلے پیار کی باتیں
بلا کے پاس پھر جبراً حیائیں چھین لیتے ہیں
مری کھڑکی کے آگے لوگ دیواریں اٹھاتے ہیں
مرے کمرے کے حصے کی ہوائیں چھین لیتے ہیں
محبت ڈھیر پر کچرے کے ہر اک جا بلکتی ہے
کہ تہمت بانٹنے والے وفائیں چھین لیتے ہیں
بتاو کس طرح تشؔنہ یہاں سیراب ہو کوئی
سمندر خشک صحرا سے گھٹائیں چھین لیتے ہیں
حمیرہ گل تشنہ