ہجر سے اب کے شروع ایک کہانی کرنا
اور مکمل بھی اسے میری زبانی کرنا
پہلے جلنا ہے جسے اپنی چتا میں اس کو
پھر کسی برف کے پیکر کو ہے پانی کرنا
یہ محبت ہے کسی وحشی قبیلے کا دھرم
اپنے ہاتھوں سے وداع اپنی جوانی کرنا
آج جنگل سے بلا لائے ہیں جگنو ہم نے
ٹھان لی اب کہ یہیں شام سہانی کرنا
گاوں سے پہلے اڑا دینا پرندے سارے
پھر بیاں خالی منڈیروں کی کہانی کرنا
پہلے کرنا ہے تجھےخواب جزیرے کا سفر
پھر کسی ہاتھ روانہ وہ نشانی کرنا
کرنا احوال بیاں شازیہ تنہائی کا جب
اس میں شامل کسی خلوت کے معانی کرنا
شازیہ اکبر