ہزار رنگ بدلتا رہا زمانے کا
وہ میں کہ رخ نہ کیا میں نے آشیانے کا
ابھی کچھ اور ارادہ ہے مسکرانے کا
ابھی تو میری ہی جانب ہے رخ زمانے کا
تمہارے نام سے منسوب کر رہا ہوں اسے
بڑا حسین ہے عنواں مرے فسانے کا
وہ داغِ دل ہو کہ زخمِ جگر قیامت ہے
چمن کا ذکر کریں ہم کہ آشیانے کا
ہنسو چمن میں ہنسو تم مگر سنبھل کے ہنسو
چرا نہ لے کلی انداز مسکرانے کا
یہ اور بات کہ پاسِ وفا سے لب نہ کھلے
خیال تھا انھیں احوالِ غم سنانے کا
چمک کے برق نے تڑپا دیا قفس میں مجھے
میں خواب دیکھ رہا تھا پھر آشیانے کا
سنا رہا ہوں زمانے کو اے فدا نغمے
بدل رہا ہوں میں ماحول اس زمانے کا۔
فدا خالدی دہلوی