ہم جو کرتے تھے وہی تم بھی عبادت کرتے
تم سے پہلے بھی کہا تھا کہ محبت کرتے
عمر ساری مری گزری ہے مری ماں کی طرح
آیت الکرسی سے اِک گھر کی حفاظت کرتے
ہر ستم سہہ کے بھی خاموش ہوں، لب بستہ ہوں
تم سے ہوتے جو اگر ہم، تو شکایت کرتے
ہم محبّت میں اگر جھوٹ کے قائل ہوتے
ہم کسی عشق کچہری میں وکالت کرتے
زَر کی تقسیم جو انصاف پہ مبنی ہوتی
لوگ بچوں کے نہ اعضا کی تجارت کرتے
ہم اگر عشق نہ کرتے تو خسارہ ہوتا
ہم اگر پیار نہ کرتے تو حماقت کرتے
آپ نے ہم کو خطا وار کہا بن پوچھے
آپ موقع ہمیں دیتے تو وضاحت کرتے
ہم کٸی تاج محل دنیا کو تحفہ دیتے
اپنے ترکے کی اگر ہم بھی حفاظت کرتے
اپنی دنیا تو یہی شہر ِکراچی تھا ثبین
چھوڑ کے اپنا سمُندَر کہاں ہجرت کرتے
ثبین سیف