غزل
ہے سینہ چاک ہر گل خنداں مرے لئے
شاید ہے سوگوار بہاراں مرے لئے
قطرے کو دے کے آب میرے دل کو احتیاج
کیا کیا اٹھائے جاتے ہیں طوفاں مرے لئے
کل وہ سنیں گے زیست کی کیفتیوں کا ذکر
رکھا گیا ہے درد کا عنواں مرے لئے
مبہم سا وعدہ آنے کا پھر قید انتظار
گھر کو بنا دیا گیا زنداں مرے لئے
شاخوں پہ گل فلک پہ ستاروں کا اہتمام
ہر بام سے ہیں جلوے نمایاں مرے لئے
ملتی ہے اک مراد تو بڑھتا ہے ایک شوق
دام بلا سے وسعت داماں مرے لئے
محمود سروش