یوں نہ سیکھا تھا گریز اہلِ سفر نے پہلے

Yoon Na Seekha Tha Gureez Ahl e Safar Nay Pehlay

غزل

یوں نہ سیکھا تھا گریز اہلِ سفر نے پہلے
قافلے آتے تھے منزل پہ ٹھہرنے پہلے

میرے اندر جو خموشی تھی وہ باہر گونجی
دلِ ویراں کی خبر دی مجھے گھر نے پہلے

کھیل طفلی میں کٹی اور تھے لیکن مجھ کو
اپنا دیوانہ کیا رقصِ شرر نے پہلے

بڑھ گئی بات تو دل کو مرے الزام نہ دے
سخن آغاز کیا تیری نظر نے پہلے

خبرِ دُوریِ منزل تو کسے تھی لیکن
حوصلہ ہار دیا اہلِ سفر نے پہلے

اب خزاں میں کسی طائر کی تمنا بھی نہیں
سائے پھیلائے بہت شاخِ شجر نے پہلے

سرفروشانِ محبت کی ادا تو دیکھو
طلبِ زیست میں نکلے ہیں یہ مرنے پہلے

نقشِ دنیا طلبی یوں نہ اُترتا تجھ میں
کر دیا موم تجھے آتشِ زر نے پہلے

ہوش منزل کو بہت بعد میں آیا ہے سلیمؔ
مجھ کو دیوانہ کیا راہ گزر نے پہلے​

سلیم احمد​

Saleem Ahmed