یہ داستانِ دل ہے کیا ہو ادا زباں سے

یہ داستانِ دل ہے کیا ہو ادا زباں سے
آنسو ٹپک رہے ہیں لفظیں ملیں کہاں سے

ہے ربط دو دلوں کو بے ربطئ بیاں سے
کچھ وہ کہیں نظر سے کچھ ہم کہیں زباں سے

یہ روتے روتے ہنسنا ترتیب ذکرِ غم ہے
آیا ہوں ابتدا پر چھیڑا تھا درمیاں سے

اس رازدارِ غم کی حالت نہ پوچھ جس کو
کہنا تو ہے بہت کچھ محروم ہے زباں سے

ہر گام پر ٹھٹھکنا، ہر بار مڑ کے تکنا
او مسکرانے والے کیا لے چلا یہاں سے

آرزو لکھنوی