منظر منظر تاریکی کا ____________ سایہ ہے
میں ہوں ، چپ ہے_____ اور اندھیرا کمرہ ہے
عشق جسے کہتے ہیں _________ وہ نیلا طوفاں
تم نے صرف سنا تھا ______ ہم پر بِیتا ہے
کن قدموں نے _______ یادوں کی دہلیز چھوئی
کون پرندہ ویرانے میں___________ چہکا ہے
بھولی بسری شکل __________ تصور میں آئی
سوچ نے ______گزرے وقت کا البم کھولا ہے
خالی دل میں گونج رہی ہے _______لمبی چپ
ویرانے کے اندر بھی _________ ویرانہ ہے
اس لہجے کا تلخ تموج__________ لوٹ آیا
چپ کی جھیل میں ____کس نے کنکر پھینکا ہے
اب ترتیب نہ رہ پائے گی_______ سانسوں میں
اب اس ڈور سے یاد کا ریشم _______ الجھا ہے
کون رکھے گا انگارے ______ چشم و لب پر
کون کھنڈر سے دل میں ____ پاؤں دھرتا ہے
دھوکہ ہیں ___ سب ساتھ نبھانے کے وعدے
اور بے لوث وفا کا دعویٰ ______ جھوٹا ہے