ملاقات

حضرتِ قیس مِرے خواب میں آئے کل شب
حُکم صادر ہوا تیرا میں قَصیدہ لِکھوں
میں نے غالب کا تَصّور میں سَجا کر َپیکر
ایک سو ایک دَفعہ مِیر تقی مِیر پڑھا
حُجرہ ءِ سوچ میں تَقدیس کا چَھڑکاؤ کِیا
عقل و دانش کے نہیں بَس میں کہ تعریف کریں
سَرِ خم ہاتھ بندھے
میرے اَلفاظ تِرے ہونٹ بنائیں کیسے
چشمِ حیرت تِری مُسکان سمجھ سکتی نہیں
خود فراموش ہوا ہوں میں تِری سُن کے ہنسی
تیرے ہاتھوں کی مہکتی ہوئی مَہندی کی قسم
وَہم و اِدراک سے باہر تِری دِلکش آنکھیں
خواب زاروں سے علاقہ ہی نہیں ہے جِن کا
بالیاں چوم کے رُخسار پَلٹ جاتی ہیں
اور کانوں میں مِرے شَہد کا رَس گھولتی ہیں
پیرہن ایسے چِپکتا ہے کہ اُترے نہ کبھی
جسم پاکیزہ مُسافَت کے نِشاں کا مَحوَر
اُوڑھنی چھیڑ کے زُلفوں کو سِرک جاتی ہے
اور چراغوں کو اَجالوں کا پتہ بانٹتی ہے
چوڑیاں رَقص میں رہتی ہیں کلائی میں تِری
ساز اور سوز کی حیرت کا مزہ لیتی ہیں
تیری اَنگُشتَری کمرے میں اُجالا کر کے
میری تنہائی کی وحشت کا فَسوں پھانکتی ہے
تیری پازیب کی چَھن چَھن کا تَرنم . . . آہا
صبح کی خَستہ سَماعت کا بھَرم رکھتا ہے
تُو جو بولے تو سِتاروں کی خَموشی ٹوٹے
تیری باتوں کے اَسیروں میں کبوتر بھی ہیں
میں نے ہُد ہُد کی زُبانی تِری تعریف سُنی
میں نے دیکھا تِرے دیدار کو چڑیوں کا ہجوم
تیرے چہرے کی تِلاوت یہاں اَشجار کریں
سرمئی لمس کی حِدَّت سے گریزاں ہو کر
سرنگوں شاخِ شجر تیرا سراپا کھینچے
اَن کہی اور کہی ہونٹوں تلک آئے اگر
تیری توصیف میں ڈھلنے کی جَسارت سے پرے
صبر کی راکھ مَلے چہرے پہ اور گِریہ کرے
پھول مرجھانے سے پہلے تجھے خوشبو سونپے
آسماں تاروں بھرے تھال نچھاور کر کے
اَیسے چُپ سادھ لے جیسے کہ ہُوا کچھ بھی نہیں
تیری اِیڑی کی رَگڑ سے کوئی سورج چمکے
تیری بالی کی چمک سے ہے قمر کی رونق
بُلبُلِ شہر تجھے اہلِ ہُنَر کہتے ہیں
کہکشاں روز اُترتی ہے تِرے آنگن میں
صبحُ دَم پھول قطاروں میں کھڑے ہوتے ہیں
جس کو تُو چُھو لے وہ گُل شاہِ گلستان ہوا
میں نے آنکھوں کے دَریچوں سے صدائیں دی ہیں
میرے ہونٹوں نے یوں چومی تِری نوکِ مِژگاں
اِن نِشانوں کے مقدر پہ ہے نازاں اَسوَد
تیرے گھر تک کی مسافت میں نے ایسے کاٹی
تیرے قدموں کے نشاں پر مِرے پاؤں نہ پڑیں
موسمِ ہجر میں راتوں کی طوالت توبہ
یہ ملاقات فرشتوں کو تیقن سونپے
ذہن و دل طوفِ عبادت کا ارادہ کر لیں
سَطر دَر سَطر مِرے لَب سے سُخن جَھڑنے لگے
چاہتا ہوں کہ مِری عمر بسر ہو جائے
چاہتا ہوں میں
مگر سوچ میں پڑ جاتا ہوں
مُختصِر کِتنا ہے
تُجھ سے یہ مُلاقات کا دِن
مُختصِر کِتنا ہے
تُجھ سے یہ مُلاقات کا دِن

دانش عزیز