سوچ کے بعد
جو عہدِ رفتہ بھلا رہی ہوں وہ میں نہیں ہوں !
جو خواب رت کو سجا رہے ہو وہ تم نہیں ہو !
چلی ہے جو مخالفت میں اپنی یہ وہ ہوا ہے
جو جنگلوں کو جلا رہی ہے جو آتشیں رنگ ڈھا رہی ہے
مسافرت میں ۔۔ جو تم کو مجھ سے ملا رہی ہے
جو قرض سارے چکا رہی ہے یہ زندگی ہے یا موت ؟
کچھ بھی خبر نہیں ہے
مگر جو دامن بچا رہی ہوں وہ میں نہیں ہوں!
جو رات آنے سے قبل ہی ایک دھندلکا ہے
یہ جھٹپٹے میں عکس تیرا ہے یا مرا ہے؟
جو مجھ کو آواز دے رہا ہے سراب جیسا
جو ایک منظر بنا رہا ہے وہ تم نہیں ہو!
وہ میں نہیں ہوں!
شائستہ مفتی