عشق سے عقل کا فقدان خریدا ہم نے
اور وہ بھی علی الاعلان خریدا ہم نے
ہم نے پتھر بھی خریدا تو وہ آئینہ تھا
کبھی یاقوت نہ مَرجان خریدا ہم نے
بُھولنے کے لیے وہ ساعتِ پیمانِ الست
وقت سے اِک نیا پیمان خریدا ہم نے
شور اُٹھا تھا کہ نابود ہوا ہے کوئی
جب ترے وصل کا ارمان خریدا ہم نے
کتنے لمحات کو اپنے لیے دشوار کیا
تب کوئی لمحۂ آسان خریدا ہم نے
بند ہونے کو دُکاں ہے تو خیال آیا ہے
فائدہ چھوڑ کے نقصان خریدا ہم نے
فیس بھرنے کے لیے جیب میں پیسے بھی نہ تھے
جِن دِنوں میر کا دیوان خریدا ہم نے
اجمل سراج