ان کی محفل میں فقط نقش بہ دیوار ہیں ہم
اس طرح بیٹھے ہیں جیسےکہ گنہ گار ہیں ہم
جو ہمارا ہے وہ رشتہ نہیں سمجھے گا کوئی
بس مقابل میں ترے آئنہ بردار ہیں ہم
حسرتیں دل کی پریشان کیے رکھتی ہیں
اپنے نا کردہ گناہوں میں گرفتار ہیں ہم
کم نظر دیکھ کے حیراں ہے یہ عالم اپنا
رقص کرتے ہوئے آتے جو سرِ دار ہیں ہم
ہم تو وہ ہیں جو بگڑ کر بھی سنور جاتے ہیں
لوگ کہتے ہیں کہ گرتی ہوئی دیوار ہیں ہم
کچھ خبر بھی تجھے اس کی ہے مرے دل کی خلش
اپنی ہستی سے بھی کچھ روز سے بیزار ہیں ہم
ہم کو شاہیں نہ رہی ہے کبھی مے کی حاجت
اپنے ہونے کے نشے سے ہی یوں سرشار ہیں ہم
شاہین برلاس