Dil wo Durwesh Hay jab wajd main hoo Boolay Ga
غزل
دل وہ درویش ہے جب وجد میں ہُو بولے گا
آسماں ٹوٹ پڑے گا تو نمو بولے گا
پوچھنے حال مرا جب وہ کبھی آئیں گے
لب تو خاموش رہیں گے پہ رفو بولے گا
پھر کریں گے ترے مجذوب وہ رقصِ وحشت
ٹوٹ جائیں گے جو گھنگھرو تو لہو بولے گا
میں ہوں کس جرم کی پاداش میں اب شہر بدر
آ ذرا دیکھ کہ خود میرا عدو بولے گا
رن میں اس شیر کی آمد ہے لعینو ، جس کا
سر اگر کٹ بھی گیا ، زخمی گلو بولے گا
اک صدا کن کی جو گونجے گی جہاں میں حامیؔ
جام چھلکیں گے صراحی سے سُبو بولے گا
حمزہ حامیؔ
Hamza Haami