درِ لطفِ حسنِ جاناں کبھی مجھ پہ باز ہوتا

Dar e Lutf e Husn e janaa kabhi mujh pa baaz hota

غزل

درِ لطفِ حسنِ جاناں کبھی مجھ پہ باز ہوتا
میں غزل سرائی کرتا وہ سخن نواز ہوتا

تھے محاذ کتنے جن پر میں لڑا ہوں ایک مدت
اگر اک جگہ پہ لڑتا تو میں سرفراز ہوتا

یہ ہماری آرزوئیں کبھی ہوسکیں گی پوری
کہ ہماری شاعری سے ترا دل گداز ہوتا

ہے مزاجِ یار نازک سو گراں گزرتا اس پر
یہ فسانہء محبت جو ذرا دراز ہوتا

غمِ دل کا پھر مداوا بھلا کس طرح نہ ہوتا
کوئی دل پہ ہاتھ رکھتا کوئی چارہ ساز ہوتا

اے ستم شعار ! گزرے اسی انتظار میں دن
کہ جفا کا پاس تیرے کوئی تو جواز ہوتا

وہ جو ہم سفر ہو اپنا ولیؔ کیسے دکھ کہاں غم
تو مرا بھی دل جہاں سے سدا بے نیاز ہوتا

شاہ روم خان ولی

Shah room khan Wali