جھوٹی محبتوں کی ضرورت نہیں پڑی
مصنوعی چاہتوں کی ضرورت نہیں پڑی
چاہت کا خوں کیا تو لکھی داستانِ شوق
ناکام حسرتوں کی ضرورت نہیں پڑی
بیٹھے رہے رقیب کے پہلو میں مطمئن
بے جا مروتوں کی ضرورت نہیں پڑی
رقصاں ہوں آج بن کے بگولہ سا دشت میں
صد شکر وحشتوں کی ضرورت نہیں پڑی
شہرِ وفا میں سینکڑوں غدار مل گئے
اس سال ہجرتوں کی ضرورت نہیں پڑی
اللہ ہمارے ساتھ تھا ہم کو جنابِ شیخ
بشری کرامتوں کی ضرورت نہیں پڑی
دشمن لگانے آگئے ضربِ دگر خلش
اس بار دوستوں کی ضرورت نہیں پڑی
سہیل ضرار خلش