سب ستارے لٹا دیۓ میں نے
اشک سارے بہادیۓ میں نے
ایک اُس شخص کے لیۓ خود کو
روگ کیا کیا لگا دیۓ میں نے
کیوں دعا عرش تک نہیں جاتی
بام و در تک ہلا دیۓ میں نے
اُس نے بے ساختہ کہا بارش
اور آنسو بہا دیۓ میں نے
دل کو ہر بار توڑ جاتا تھا
قفل اُس پر لگا دئیے میں نے
جس نے سن کر بھی ان سنی کردی
درد اُس کو سُنا دئیے میں نے
جب جہاں جس پہ راج کر ڈالے
پیار منتر سِکھا دیئے میں نے
عشق تازہ کی حدتیں، توبہ
خط پرانے جلا دیئے میں نے
اپنے مطلب سے جو ملے ہر دم
وہ بھی رشتے نبھا دیئے میں نے
تاجور عشق کا تقاضہ تھا
غم اُٹھا کر چُھپا دیئے میں نے
تاجورشکیل