غزل
ترا بلبل ہوں تجھ گل کی قسم ہے
برہ سوں مست ہوں مل کی قسم ہے
رقیب رو سیہ کھاوے گا اب مار
مجھے تجھ کالے کاکل کی قسم ہے
لئے دل پھرتے ہیں دور زلف میں
مجھے اوس کے تسلسل کی قسم ہے
نہ کر توں بوالہوس اوپر تلطف
ترے دل کے تامل کی قسم ہے
خدا آخر کرے گا خوش مرا دل
مجھے اپنے توکل کی قسم ہے
نہیں ہوتا ہوں ملنے سیں کبھی سیر
ترے من کے تفضل کی قسم ہے
نہ رہ غافل توں اپنے مبتلاؔ سوں
تجھے تیرے تغافل کی قسم ہے
عبید اللہ خاں مبتلا