بنتا نہیں صنم کوئی پتھر ہوۓ بغیر
جچتی نہیں خوشی بھی کوئی غم سہے بغیر
قسمت کے کھیل ہیں یہ ستاروں کی چال ہے
مل جاتے ہیں جو لوگ دلوں کے ملے بغیر
پھیری تھیں اس نے بزم میں نظریں کچھ اس طرح
سب کچھ ہی جیسے کہہ گیا کچھ بھی کہے بغیر
الفاظ اس کے تھے یا وہ لہجے کی کاٹ تھی
ٹوٹا تھا دل کا آئینہ ٹھوکر لگے بغیر
بت کی طرح وہ رہتے ہیں نظروں کے سامنے
رہتا نہیں ہے دل انہیں پتھر کہے بغیر
دن گن رہے ہیں زیست کے فرقت میں جان جاں
کٹتی نہیں ہے رات بھی تارے گنے بغیر
سورج یہ تیرے حسن کا ڈھل جائے گا کبھی
کٹ جاۓ گی یہ عمر بھی میری ترے بغیر
ہوتے ہیں ایسے لوگ بھی اکثر ہمارے ساتھ
ملتے نہیں سعید جو مطلب لئے بغیر
احمد سعید خان