عجیب رنگوں کے نقشے یہ کیا بنا دیے ہیں
خمیر ایک تھا چہرے جدا بنا دیے ہیں
یہ بھوکے پیاس کے مارے یہ بے لباس بدن
نصیب لوگوں کے عجلت میں کیا بنا دیے ہیں
زمیں پہ اپنا خلیفہ بنا کے بھیجا ہمیں
ہمی سے کیوں بھلا خواجہ سرا بنا دیے ہیں
جبیں کہاں پہ دھریں کچھ سمجھ نہیں آتا
خدا پرستوں نے اتنے خدا بنا دیے ہیں
فساد و شر نہ اٹھائیں تو کیا کریں یہ خدا
جب ایک دوجے سے سارے خفا بنا دیے ہیں
غزل کے شعر نہیں ہیں جنوں کے شکوے ہیں
ہمارے دل نے کہا ہے بنا ! بنا دیے ہیں
شاہ دل شمس