ظلم کی ہر داستاں لکھتی رہی
ظالموں کے درمیاں لکھتی رہی
مُنتشر ہے کارواں لکھتی رہی
بے خطر اور بے تکاں لکھتی رہی
اس قدر تھا مجھ کو پاسِ مصلحت
بد گماں کو خوش گماں لکھتی رہی
یہ کمالِ خود فریبی دیکھیے
میں قفس کو آشیاں لکھتی رہی
بزدلی تھی یا شرافت تھی مری
دھوپ کو میں سائبان لکھتی رہی
بات کرنے سے گُریزاں وہ رہا
میں بھی خود کوبےزباں لکھتی رہی
شاہدہ میں اور کیا کرتی بَھلا
رائیگاں کو رائیگاں لکھتی رہی
شاہدہ عروج خان