جانے یہ کیسا ماجرا ھے میاں
مجھ میں سب کچھ مرے سوا ھے میاں
میرے ہی لفظ اور مرا لہجہ
مجھ میں یہ کون لب کشا ھے میاں
درِ دل پر ہجوم کرتی یاد
یہ ترے ہجر سے سوا ھے میاں
تیرے بیمار کو افاقہ نہیں
ہاتھ سینے ہی پر دھرا ھے میاں
یہ جو آنکھوں سے بہہ رہا ھے لہو
مجھ میں اک خواب مر گیا ھے میاں
ایک مدت سے یونہی لمحہ ء وصل
بسترِ خواب پر پڑا ھے میاں
کیا کہوں کیا ہیں معنی ء حیرت
روبرو میرے آئینہ ھے میاں
تیرے اس لمحہ ء کمال کی خیر
مجھ کو تسخیر کر لیا ھے میاں
آپ کے دل میں گھر بنانا تھا
کتنا مشکل سفر کیا ھے میاں
اتفاقا ” جو مل گیا تھا ہمیں
اتفاقا ” جدا ہوا ھے میاں
کوئی دستک نہ کوئی آوا زہ
درِ احساس کب سے وا ھے میاں
کیوں رہوں کل کے باب میں بددل
جو تھا ہونا سو وہ ھوا ھے میاں
ہم نے امکاں کی روشنی کا شجر
سر ِراہِ لگا دیا ھے میاں
پروین حیدر