اَے ساکنِ کُوفہ تری پیماں شکنی بھی

سلام

اَے ساکنِ کُوفہ تری پیماں شکنی بھیدَرپیش
ہے سیّد کو غریب الوطنی بھی

شِکوہ نہ کیا اُمّتِ بے مِہر کا شَہ نے
چادر غم و افسوس کی گو سَر پہ تَنی بھی

چرچا نہ ہو کیوں شِمر کا بازارِ ستم میں
خُوں رَنگ ہے تلوار بھی نیزے کی اَنی بھی

افسوس صَد افسوس کہ اَے سیّدہ زینب
تقریر میں بدلی ہے تِری کم سخنی بھی

کیوں سَہل نہ ہو رَاہِ شہادت کا چُناؤ
حرُ صاحبِ اِیماں بھی ہے قسمت کا دَھنی بھی

اَے قاتِلو ، اَے کُوفِیو بَس اِتنا بتا دو
یُوں خُون بہانے سے کبھی بات بَنی بھی

ٹھہرے گا مُقابِل تِرے کیا کوئی یزیدی
عادِل تُو عَلَمداری بھی ہے پَنجتَنی بھی

عادِل یزدانی چنیوٹ