فہمی بدایونی کا اصل نام زماں شیر خان عرف پتن خان ہے۔ ان کی پیدائش 4 جنوری 1952ء کو قصبہ بسولی ضلع بدایوں میں ہوئی۔ اردو ادب میں وہ "فہمی بدایونی” کے نام سے مشہور ہیں۔ابتدائی تعلیم کے بعد زندگی کی ضرورتوں نے کم عمری میں ہی لیکھ پال کی ملازمت کرنے پہ مجبور کر دیا۔  کچھ عرصے بعد جب یہ ملازمت نہ رہی تو ریاضی اور سائنس کی کوچنگ کرنے لگے فہمی کی شاعری میں جدیدیت، سنجیدہ فکر و خیال اور نئے نئے زاویے دیکھنے کو ملتے ہیں۔ نئی طرز میں گفتگو کرتے ہوئے ان کے اشعار سیدھے دل میں ایسے اترتے ہیں کہ پڑھنے والا تعریف کیے بغیر نہیں رہ سکتا۔ ان میں درد بھی ہے تڑپ بھی اور طلب بھی ہے۔ انھوں نے جو بھی خیال شاعری کے حوالے سے پیش کیے وہ سچے نظر آتے ہیں۔ ان کی شاعری کے تین مجموعے "پانچوی سمت” دستکیں نگاہوں کی” اور "ہجر کی دوسری دوا” منظر عام پر آ چکے ہیں انہوں نے ۷۲؍ سال کی عمر میں بسولی میں اپنے گھر پر ہی آخری سانس لی۔ پسماندگان میں اہلیہ، دو بیٹے اور ایک بیٹی ہے۔ وہ مردم خیز خطہ بدایوں کے ان چنندہ شاعروں میں تھے جنہوں نے عالمی سطح پر اپنی شناخت قائم کی۔ اپنی شاعری اور اپنے خاص انداز کے ذریعہ مداحوں کے دلوں پر راج کرنے والے شاعر فہمی بدایونی کا انتقال نہ صرف بدایوں بلکہ اردو دنیا کے لئے بڑا خسارہ ہے