اُتر کے ساتھ ہی آئی ہے اُس کے روحِ خرد
ورق کتاب کے زیرِ قبا چھپائے ہوئے
سفید مُو میں لیے دانشِ قدیم کے راز
فضا کی زلفِ توہُّم زدہ جلائے ہوئے
حسابِ سود و زیاں میں وہ اک ریاضی داں
رموزِ صفر سے سرّ ِ حیات پائے ہوئے
وہ دشتِ فکر میں جھلسا ہوا سا اک چہرہ
ہجوم میں بھی غمِ برتری چھپائے ہوئے
ضمیرِ عصر و نمو پروری کا ابرِ مطیر
کنایہ، موجِ نفَس میں کوئی چھپائے ہوئے
وہ ہم مزاجِ ارسطو و بُو علی سینا
اک اپنی خلوتِ یکتا میں سر جھکائے ہوئے
عزیز حامد مدنیؔ