اپنی ہی ذات تک کا سفر کیجئے
معرکہ زندگی کا یوں سر کیجئے
پھولنے پھلنے دیں پہلے اشجار کو
پھر کوئی آرزوئے ثمر کیجئے
جن سے تضحیکِ انساں عیاں صاف ہو
ایسی باتوں سے تو در گزر کیجئے
پھر یہ لمحات شائد ملیں نہ ملیں
خود ہی سے گفتگو رات بھر کیجئے
راہِ الفت کا انجام اب کچھ بھی ہو
سوچنا چھوڑیے اور سفر کیجئے
خواہشِ ماہ و انجم بھی جاری رہے
رشکِ ماہتاب اور بحر و بر کیجئے
ان پہ ہو گا کوئی بھی اثر اب نہیں
لاکھ دنیا اِدھر سے اُدھر کیجئے
کل کی کل دیکھی جائے گی لیکن ابھی
آج کی رات کی تو سحر کیجئے
کوئی کرتا ہے کیا چھوڑیے چھوڑیے
اپنے حالات پر بس نظر کیجئے
حور و غلمان کا ذکر چھوڑیں رجب
اب بیاں داستانِ بشر کیجئے
رجب چودھری