ترا لہجہ

تِرا لہجہ”

تِرا لہجہ نہایت خوب صورت ہے
تِرے الفاظ میں
انمول اپنا پن جھلکتا ہے
تِری آواز میں
غزلوں کا دھیما پَن مہکتا ہے
کوئی سُر ہے،کوئی لے ہے،
تیری سانسوں میں
سرگم ہے
پِکاسو ، شکسپیئر اور تو غالب کا سنگم ہے
تِرے نازک اشاروں پر
مِرا مَن مور بن کر رقص کرتا ہے
تِرا چہرہ اچانک
آئینے میں جب ابھرتا ہے
در و دیوار کمرے کے
مجھے مہکانے لگتے ہیں
تِری آواز میں
کھڑکی کے پردے گانے لگتے ہیں
مِرا وجدان کہتا ہے
یہ کمرے میں پڑا گلدان کہتا ہے
ترا لہجہ نہایت خوب صورت ہے

شہباز نیّر