تماشا کر چکی چشمِ تماشا ہم نہ جاگیں گے
جسے کرنا ہو کر لے حشر برپا ہم نہ جاگیں گے
یہ کہہ کر سو گئے دشتِ فنا میں جاگنے والے
کہ تا شورِ نشورِ صبحِ فردا ہم نہ جاگیں گے
گراں گزرے نہ اپنا جاگنا ان اہلِ محفل پر
چلو یہ کہہ کہ سو جائیں کہ اچھا ہم نہ جاگیں گے
تھکن سے چور تھے، نیند آ گئی، سوتے ہیں، سونے دو
بس اب کہہ تو دیا تم سے کہ بابا ہم نہ جاگیں گے
ابھی بار سماعت ہم سہی ، کل تم بھی سن لینا
صداؤں پر صدا دے گی یہ دنیا ہم نہ جاگیں گے
تھکے چہرے ، بجھی آنکھیں ، وفا نا آشنا لہجے
اب ان بے رنگ و بو فصلوں میں تنہا ہم نہ جاگیں گے
جو ممکن ہو تو سوتے میں بھی آنکھیں نیم وا رکھنا
کہ اچھا تو نہیں یہ کہہ کے سونا ہم نہ جاگیں گے
ہوا کا بین ، ڈھلتی روشنی ، دم توڑتا سورج
یہ کہتا ہے سکوتِ شامِ صحرا ہم نہ جاگیں گے
نمازِ خوف پڑھ کر سب کے سب قبروں میں جا لیٹے
اور اس انداز سے خالد کہ گویا ہم نہ جاگیں گے
خالد علیگ