غزل
جا بجا تم بیٹھنے اٹھنے لگے جس تس کے پاس
کون کہتا ہے کہاں کس وقت کس دن کس کے پاس
نام اگر منظور ہو تو یہ ہنر پیدا کرو
امتیاز اخلاق ادب دلجوئیاں مجلس کے پاس
لذتیں دونوں جہانوں کی ہوئیں اس کو نصیب
ماہرو سیمیں بدن غنچہ دہن ہو جس کے پاس
اہل ثروت ہیں جو رکھتے ہیں یہ دولت یاں کہاں
داغ دل ٹکڑے جگر غم درد الم مفلس کے پاس
عشقؔ جاوے کون گھر اس کے بجز منکر نکیر
بے زباں بے گوش بیدل بے سخن بے حس کے پاس
خواجہ رکن الدین عشق