جان جان تجھ سے اگر مجھ کو محبت ہے تو ہے

جان جان تجھ سے اگر مجھ کو محبت ہے تو ہے
اور دنیا کے لیے گر یہ قیامت ہے تو ہے

کوئی اس کو جان جان کہہ کر بلا سکتا نہیں
ساری دنیا میں بس اک مجھ کو اجازت ہے تو ہے

جل رہا ہے سارا عالم یہ نگاہیں دیکھ کر
اس کی نظروں کی اگر مجھ پر عنایت ہے تو ہے

ہر غزل پڑھتی ہے مجھ کو دیکھ کر محفل میں وہ
دیکھ سکتے ہو تو دیکھو یہ حقیقت ہے تو ہے

اور ایسے تھوڑی ہاتھ میں رکھا ہوا ہے ہاتھ یہ
زندہ رہنے کے لیے تیری ضرورت ہے تو ہے

سامنے دو زانو ہو کر تم یہاں بیٹھی رہو
اس طرح سے دیکھنا تم کو عبادت ہے تو ہے

چلتے چلتے دفعتاً دھکا دیا اور ہٹ گئے
تم سمجھتے ہو اگر اس کو شرارت ہے تو ہے

یاسر سعید صدیقی