غزل
جس دیس ترے حُسن کی جاگیر کُھلے گی
شمشیر پہ شمشیر پہ شمشیر کُھلے گی
یہ بندِ قبا صرف نہیں بندِ قبا یار
جس دن بھی کُھلا یہ، مِری تقدیر کُھلے گی
اِک ناؤ بناؤں گا، سجاؤں گا تبھی تو
اِس دَور کے رانجھا پہ نئی ہیر کُھلے گی
دہلیز پہ فوراً میں چلا آؤں گا تیری
جس روز مِرے پیر کی زنجیر کُھلے گی
آنکھوں کو مرِی چھوڑ کے وہ خواب گیا ہے
اب اور کسی آنکھ پہ تعبیر کُھلے گی
ہو جائے گا ٹھنڈا مِرے محبوب کا غصہ
جب خط میں چھپی لذّتِ تحریر کُھلے گی
اب وقت زباں کھولنے کا آ گیا شاعرؔ
اب صاحبِ توقیر کی توقیر کُھلے گی
شاعر علی شاعر