درِ رازِ حقیقت دستکِ عرفاں پہ کھلتا ہے
مگر عرفاں کا دروازہ دلِ حیراں پہ کھلتا ہے
خرد کے کرّ و فر پہ عشق کا عقدہ نہیں کھلتا
جو کھلتا ہے جنوں کی چاکئِ داماں پہ کھلتا ہے
وہ ٹھاٹھیں مارتا ہے قلبِ مضطر میں تو بہنے دو
کہ اس دریا کا رستہ قطرہء مژگاں پہ کھلتا ہے
نہ کرنا تم کبھی توبہ خدارا قتل سے میرے
کہ رنگِ خونِ عاشق دستِ معشوقاں پہ کھلتا ہے
کہاں جاتی ہے جاں سے جاں نکل کر بابِ ہستی سے
یہ ایسا بھید ہے جو کب حریمِ جاں پہ کھلتا ہے
جنون و عشق و سر مستی اگر منزل مری ٹھہری
تو اس منزل کا ہر رستہ درِ وجداں پہ کھلتا ہے
ہو وہ چہرہ کہ خود مشّاطگی بھی یہ کہے راشد
کہ غازہ حُسن کا بس اس رُخِ تاباں پہ کھلتا ہے
راشد حسین راشد