دیوانہ بنانا ہے تو دیوانہ بنا دے

دیوانہ بنانا ہے تو دیوانہ بنا دے

ورنہ کہیں تقدیر تماشہ نہ بنا دے

.

اے دیکھنے والو مجھے ہنس ہنس کے نہ دیکھو

تم کو بھی محبت کہیں مجھ سا نہ بنا دے

.

میں ڈھونڈھ رہا ہوں مری وہ شمع کہاں ہے

جو بزم کی ہر چیز کو پروانہ بنا دے

.

آخر کوئی صورت بھی تو ہو خانۂ دل کی

کعبہ نہیں بنتا ہے تو بت خانہ بنا دے

.

بہزادؔ ہر اک گام پہ اک سجدۂ مستی

ہر ذرے کو سنگ در جانانہ بنا دے

بہزاد لکھنوی