سحرعرب، فسونِ عجم بیچئے حضور
بازارِ منفعت ہے، قلم بیچئے حضور
انبوہِ مفلساں کو قناعت کے نام پر
افسانۂ وجود و عدم بیچئے حضور
مشکل نہیں مداوا غمِ روزگار کا
نامِ خدا، خدا کی قسم بیچئے حضور
تعمیر کیجئے کسی قاتل کا مقبرہ
حوریں فروخت کیجے، ارم بیچئے حضور
مسلم پھنسے تو اس کو خدا بیچ دیجئے
ہندو پَٹے تو اس کو صنم بیچئے حضور
میلاد ہو تو بیچئے نعلین مصطفیٰ ﷺ
مجلس ہو تو حسینؑ کا غم بیچئے حضور
غُبّارے بیچنا بھی کوئی کام ہے بھلا
مومن اگر ہیں آپ تو بم بیچئے حضور
عارف امام