جہاں مشکل پڑی اِس زندگی میں تب

مری اِمداد کو تو ہی تو آیا ہے

محمد مصطفی کے نام پر سانسوں کا لینا

قیامت تک مرے اِیمان کا حصہ رہے گا

بھنور نے راستہ کشتی کو دل کی دے دیا کہہ کر

مسافر نے ترے دل سے لیا ہے نام آقا کا

شاز ملک کی شاعری نے جس فضا میں آنکھ کھولی وہاں نسائی ادب میں پروین شاکر کی خوشبو پوری توانائی سے رچی بسی تھی، اِس صورت حال میں پروین شاکر کے اسلوب اور لہجے سے بچ کر اپنے ہونے کا اعلان اپنے قاری سے کرانا یقینا بہت بڑی کامیابی ہے جو شاز ملک نے اپنی محنت اور لگن سے حاصل کی،شاز ملک کے ہاں خیال کی لطافت دکھائی دیتی ہے، شاز ملک نے رموزِ تصوف اور فلسفے کی گتھیوں میں خود کو اْلجھانے کے بجائے نئی نئی راہیں پیدا کی ہیں جو صرف شاز ملک کا خاصہ ہیں ہجر و وصال رشک و حسد محبوب کی غمزہ و ادا، اْس کی نفسیات کی عکاسی اور وارداتِ محبت کی عکاسی ہی شاعری میں کی ہے، اِن کی شاعری میں اکیسوی صدی کی عورت بھی دکھائی دیتی ہے جو اپنا حق لینا جانتی ہے مگر اِس صورتحال میں اپنی مشرقی روایت کو تار نہیں کیا بلکہ روایت میں رہتے ہوئے اپنے ہونے کا اعلان کیا ہے یہ چند اشعار دیکھیں اور خود ہی فیصلہ کریں کہ شاز ملک کی شاعری شاز ملک کی شخصیت کا کون سا پہلو اپنے قاری پر آشکار کر رہی ہے۔شاز ملک کے اشعار شاز ملک کی شخصیت کو خود عکس کر رہے ہیں میں نے یہی محسوس کیا ہے

وہ میری روح کا محرم فقط ہو ساتھ بس میرے

یہ ہی میری ضرورت ہے مجھے تسلیم ہے بھائی

اِک تعلق کو نبھانے کی غرض سے عمر بھر
بے دھیانی میں رہے ہم بے دھیانی میں رہے

کچھ چبھن اْوڑھے ہوئے اور کچھ لگن اْوڑھے ہوئے
جی رہی ہوں زندگی کو میں تھکن اْوڑھے ہوئے

میں کیسے بھلا تجھ کو دے دوں خلاصی
مرے عشق کی تو نے توہین کی ہے

تعلق بوجھ کی صورت مجھے ڈھونا پڑا اے دل
تو پھر رستے بدلنے کے سوا میں اور کیا کرتی

تیرا مجھ سے ملنا اور راستہ بدل جانا
یہ مری کہانی کا انتساب ہے کیا ہے

شاعری کوئی جامد شے نہیں جس کو ہم کسی خاص دائرے میں محدود کر سکیں شاعری کا دائرہ بہت وسیع ہے۔ یہ ایک جذبہ ہے جس کی جڑیں جمالیاتی ذوق کے اندر سے نکلتی ہیں اِسی کے ساتھ وہ فکری عمل سے بھی بے نیاز نہیں، شاعر کی دنیا وہاں سے شروع ہوتی ہے جہاں تمام دنیا کی حدیں تمام ہوتی ہیں شاعر محسوسات کی دنیا سے وہ نتائج اخذ کرتا ہے جہاں سائنس کی رسائی ممکن نہیں مگر جذبہ ہو یا فکر خلوص کے بغیر سچی شاعری کو جنم نہیں دے سکتا۔ حالی نے شاعری کے لیے جو شرط لگائی وہ خلوص ہے اگر شاعری میں خلوص نہیں تو اِس میں تاثر پیدا نہیں ہو سکتا شاعری میں تجربے کرنا کوئی بری بات نہیں بلکہ ضروری ہے، شاز ملک پر خلوص بھی ہیں اور شاعری سے محبت بھی کرتی ہیں یہی وجہ ہے کہ شاز ملک کے ساتھ یہ شاعری بھی اچھا برتاؤ کر رہی ہے۔ جہاں تک اردو شاعری کا تعلق ہے اس نے ہمیشہ اپنے اندر وسعت رکھی ہے مواد کے اعتبار سے بھی اور ہیت کے لحاظ سے بھی کل تک ہماری شاعری کیا تھی اور آج اِس شاعری کی تصویر کیا ہے زبان و بیان کے کرشمے جو اردو شاعری نے دکھائے وہ اتنی سرعت کے ساتھ ہماری زندگی میں جگہ پاگئے کہ دوسری زبانیں دیکھتی رہ گئیں فنون لطیفہ میں شاعری کا مقام بہت بلند ہے اور شاعری کی سب سے اہم صنف غزل ہے غزل کی کچھ روایات ہیں جو مدت دراز سے چلی آرہی ہیں شاز ملک نے اِن روایات سے بغاوت نہیں کی بلکہ اِن روایات میں رہتے ہوئے انہیں مزید سنوارنے کی بھرپور کوشش کی ہے شاز ملک کی مادری زبان پنجابی ہے مگر اِن کی اردو شاعری کسی بھی صورت ایسی نہیں جسے نظر انداز کیا جا سکے شاز ملک نے اِن فرسودہ روایات کے خلاف آ واز بھی بلند کی ہے شاز ملک نے مردہ پرستی کے کوچے سے غزل کو نکال کر ایک فطری ماحول میں داخل کرنے کی سعی کی ہے۔شاز ملک کے ہاں عروضی معاملات عین عروضی نظام کے مطابق ہیں جبکہ کہیں کہیں اِن کے ہاں اضافتی نظام سے بغاوت دکھائی دیتی ہے مگر یہ بغاوت میرے نزدیک بجا ہے کیونکہ اسے ثابت کرنے کے لیے ایک ٹھوس دلیل موجود ہے جو کہہ رہی ہے لفظ جس زبان سے ہجرت کرکے داخل اردو ہوا تو وہ باضابطہ اردوایا گیا اب وہ لفظ اردو زبان کا ہی کہلائے گا، اِس لیے اضافت کا عیب وہ نہیں مانتی تو یہ آنے والے وقتوں میں تسلیم کیا جا سکتا ہے شاز ملک نے بحر کے آخری رکن میں زحاف کے استعمال سے گریز نہیں کیا یہی وجہ ہے کہ فاعلاتن کا آخری سبب خفیف زحاف کی زد میں آگر فاعلن بنا یا مفاعیلن کا آخری سبب خفیف زحاف کی نذر ہو کر فعولن رہ گیا مگر شاز ملک نے کہیں بھی شعر کے مفہوم کو کمزور نہیں ہونے دیا۔
شاز ملک بلاشبہ ایک برجستہ شاعرہ ہیں، شاز ملک کے اشعار میں کی گئی خامیاں مختلف قسم کے حالات و واقعات پر مبنی ہیں بہرحال شاز ملک شاعری کے خارجی پہلوؤں کی طرف متوجہ ہو چکی ہیں اکثر جگہ ان کا کلام پیچیدہ ہونے کے ساتھ ساتھ ناقابل فہم ہو گیا ہے اور اشعار کی شرح کرتے وقت ایک طالب علم کے لیے ایسا ہوگا جیسے وہ کوئی معمہ حل کر رہا ہے شاز ملک کی زبان سہل ہے اور بعض جگہ ناہموار بھی دکھائی دیتی ہے مگر مصرع کی تقطیع کرنے سے مصرع بحر میں دکھائی دے گا یہ پہلو اِس بات کی نشاندھی کرتا ہے کہ شاز ملک بحر کو بھی سامنے رکھ کر شعر کہتی ہیں جو میرے نزدیک اِن کی شاعری کا کمزور پہلو ہے کیونکہ بحر اور قوافی سامنے رکھ کر شعر تو ہو جاتا ہے مگر وہ اپنی خوشبو برقرار نہیں رکھتا وہ ایک کاغذی پھول کی مافق ہوتا ہے۔ شاز ملک نے اپنی شاعری کو فلسفہ اور تصوف سے جوڑے رکھا ہے جو اِنہیں اپنے ہم عصروں میں نمایاں مقام دلارہا ہے۔شاز ملک کی شاعری کا میدا ن وسیع ہے خیالات کی فراوانی مضامین آفرینی اور الفاظ کی بنت شاز ملک کو عہد حاضر کی قابل قدر شاعرہ ہونے کا اعزاز دلوا رہی ہیں۔اِس شعر پر میں اپنا یہ مضمون طے کرتا ہوں شاز ملک نے کیا خوب کہا ہے