عجب تھی درد کی طرزِ فغاں گذشتہ سال
حیات بن گئ کارِ زیاں گذشتہ سال
شمار کر نہ سکے غم کی ایسی یورش میں
نہ حسرتیں ہی نہ محرومیاں گذشتہ سال
شکستہ ڈال سے آندھی میں جیسے آم گریں
تھی زد میں پوری صفِ دوستاں گذشتہ سال
جوانِ رعنا حسیں لوگ ہوگئے رخصت
رہی نہ کوئ بھی تاب و تواں گذشتہ سال
گرا رہی تھیں حوادث کی بجلیاں ہر سو
افق پہ چھائی ہوئی بدلیاں گذشتہ سال
جلے تھے کتنے ہی پھولوں کے ریشمی چہرے
ہٹا چمن سے نہ بارِ خزاں گذشتہ سال
دبی ہوئی وہ کسی آہنی شکنجے میں
تھی ارضِ خاک کی عمرِ گراں گذشتہ سال
خدا کرے نہ کبھی نور ایسا سال آئے
کہ جیسے گذرا ہے سالِ رواں گذشتہ سال
نورِ شمع نور