منسلک ہو کر تمہارے نام سے

غزل

منسلک ہو کر تمہارے نام سے
مطمئن ہوں گردش ایام سے

بن گئے میرے لیے الزام سے
جو پیام آئے تمہارے نام سے

ہے تصور میں ترے گیسو کی چھاؤں
نیند آئی ہے بڑے آرام سے

جن کی تحریروں سے پہچانا گیا
کچھ خطوط ایسے بھی تھے گمنام سے

آج تنہا آپ ہی رسوا نہیں
ہو گئے ہیں ہم بھی کچھ بدنام سے

تیرے آنے کی خبر کے باوجود
کس قدر بے تابیاں ہیں شام سے

کچھ کسر مرنے میں باقی ہی نہ تھی
جی اٹھا بسملؔ ترے پیغام سے

بسمل آغائی